Historia

“Para aproximarse á Cidade Infantil Príncipe Felipe cómpre achegarse a esa magnífica atalaia sobre a cidade de Pontevedra chamada Montecelo, onde respirar se fai gracia e virtude, porque alí medran o piñeiro, o eucalipto e a mimosa coróase de amarelo. É necesario subir a este lugar limpo, aberto e cheo de silencio para gozarmos do marabilloso espectáculo da imaxe dunha Pontevedra preta e apiñada, como arroupándose as casas unhas a outras, para deixar máis sitio e espacio ó Lérez que parece desde aquí todo o limpo e poético que din os poetas“.

García Pereira describiu así a localización da cidade infantil o mesmo mes da súa posta en funcionamento. O 26 de xullo de 1976 os reis de España inauguraban as novas instalacións acompañados do daquela presidente da Deputación, José Luís Pelaez Casalderrey, de funcionarios e numeroso público. As novas instalacións solucionaban así un problema existente desde había anos, a falta de espacio para lles prestar unha asistencia infantil adecuada ós nenos e mozos do Fogar provincial.

Tras moitas negociacións e buscas atopáronse, a uns dous quilómetros de Pontevedra, os terreos axeitados para construír os centros de acollida e de educación; despois de seis anos de duro traballo, a primeiros de setembro dese ano, a institución empezou a funcionar cos nenos do Fogar provincial e do Colexio de xordomudos da Lanzada. O vello edificio do ex-convento de xesuítas deu paso a unhas novas edificacións adaptadas ós novos tempos, con capacidade para máis de 200 rapaces. Hai pouco modernizáronse as instalacións e actualmente o sistema dun gran centro de acollida deu paso a unidades pequenas que se pretende sexan máis acolledoras e semellante a un fogar, para que os nenos poidan levar unha vida máis familiar e unha atención personalizada.