A documentación
Rematadas as sucesivas actuacións de organización e descrición dos fondos documentais conservados no arquivo municipal inventariouse un total de 2.323 unidades de instalación, con testemuños documentais que presentan unhas datas extremas do período interanual de 1839 ata 2016.
A maior parte dos fondos datan do século XX con notorias perdas documentais, especialmente significativas no referido ós libros de actas do Pleno onde non se conservan testemuños dende 1840 ata 1866 e de 1885 a 1888; tampouco existen hoxe os libros de actas correspondentes á Xunta Municipal de Asociados.
Aquela documentación referida ó control e xestión presupostaria e ós impostos da contribución territorial rústica e urbana é a máis abundante e a máis antiga, só complementada no que se refire ó século dezanove con algúns documentos de educación, obras municipais ou patrimonio.
Este conxunto documental, hoxe correctamente disposto para o seu uso e manexo, dispón dunha ampla gama de instrumentos de descrición que permiten a súa valoración e recuperación. O cadro de clasificación deste arquivo e o seu inventario somero complétanse cunha exhaustiva descrición, a nivel de expediente en moitas series, a disposición de calquera interesado tanto no propio concello coma no Arquivo da Deputación Provincial de Pontevedra, en soporte papel (fichas) e informático nunha base de datos formada por 20.006 rexistros diferentes.
|